一直留喺多倫多養胎嘅陳茵媺，今朝5點幾，終於返嚟香港同大家見面喇！

自7月喺加拿大擺喜酒之後，同老公陳豪分隔兩地兩個月嘅佢，戴住勁閃嘅鑽石戒指，手鏈同耳環，一個幸福貴婦look出閘，Aimee爸爸亦都陪住寶貝女一齊返港。

老公陳豪雖然雙眼爆晒紅筋，不過仍然難掩興奮，一見到Aimee仲即刻摸吓肚仔，仲拖住老婆手，一齊面對一早喺機場等佢哋嘅50位記者朋友。

由神秘請假喺歐洲結婚，到返加拿大養胎擺喜酒都冇乜發言嘅佢哋，喺機場終於講多咗少少嘢喇，但係對BB嘅性別、預產期，甚至英文名等等就仍然封口，只係話要睇醫生後先再公佈，但係Aimee就話陳豪一定會入產房陪產囉！

準老竇陳豪繼續係開心到面紅紅，佢話問准醫生後會親手剪臍帶，記者問佢怕唔怕見到血淋淋場面，佢就幽默咁話自己扮演過好多次醫生喎。