潘頓同蘇保羅呢個澳紐騎練組合，威力一向唔差，兩人今午（10日）吼準泥地賽一舉行即起筷，於第六場四班泥地1200米攜手勝出「一帆風順」，此駒第三季在港上陣，初跑泥地終開齋，單Win及組合獨贏A1分別派44.5及16元。

蘇保羅一早講明季初出馬唔會多，部署將會循序漸進。佢於開鑼日（3日）獨出「香江新星」（已退役）無功而還，剛周三直頭冇馬出，今日則恢復出兩駒，並憑綠燈落飛馬「一帆風順」建功，此駒沿途守四五位，負130重磅下，直路仍一騎即有，彈甩贏兩馬位，澳洲自購馬跑至6歲終打開在港勝門，蘇保羅亦告取得新馬季首Win。

潘頓方面，佢在開鑼日交白卷，剛周三（6日）憑方嘉柏「事必獲利」季內首贏頭馬，今場以「一帆風順」延續勝勢，個人演出開始入局。

第六場為全日首場泥地賽，二、三名「霸氣」及「大收成」亦屬綠燈落飛馬，第四名則是匆出冷門「勇冠多」，四重彩派五萬四千幾。三T正獎有人0.8注中，每注派2,850萬左右。