公民廣場將於明日（28日）重開，但日常只會用作職員及訪客的往來通道，如市民想如以往般在公民廣場集會或遊行，則必須事先申請，並只可在周日及公眾假期指定時段內使用。市民認為此方式只是有限度開放，如無法如以往般全面開放讓公眾自由使用，就不能稱作「公民廣場」。

任職工程人員的黃生指，曾於公民廣場參與集會的他表示，如只能有限度開放，倒不如改名為「私人中共廣場」，「唔應該要申請，香港暫時應該仲有自由，（平日限定出入）咪即係私人地方」，「有限度重開梗係唔好啦，不如唔好開，一開就真係要做返公民廣場，唔會有限制先叫做公民廣場。要申請得就梗係可以唔批啦，唔使問就梗係唔會批畀唔順眼嘅人，批就批畀着藍色衫嗰啲人」。

同樣任職工程人員的何生，以往曾在公民廣場集會，平日工作亦會出入公民廣場，指「嘥氣啦，到時有人喺度（集會）咪又會加個欄，咪又係特定團體先會批，批嘅門框喺邊又唔知。咪又係批畀民建聯，支持朱經緯嗰啲」。對於平日未能開放給大眾使用，他表示「咁咪唔係公民廣場囉，有資格嘅人士先入得」。

任職文職的嚴小姐平日工作會出入立法會，以往亦曾於公民廣場集會，「又唔係拆曬啲欄杆，（要申請）即係唔係真正開放，以前都唔係咁」。她認為即使開放給職員及訪客使用亦不見得方便，「（作為職員及訪客）你唔會行中間，梗係行旁邊快㗎啦」。她亦認為特首林鄭月娥願意開放公民廣場不會為新上任帶來正面效果，「都唔夠決斷，係開放就拆曬啲欄杆」。