中環在線:李寧CEO違規 罰$2000了事 - 李華華

蘋果日報 2011/02/23 00:00


沉寂咗一排嘅李寧(2331)又有新消息喇!不過,今次就唔關體育王子李寧嘅事。話說李寧行政總裁張志勇,被指「逾期提交公司權益披露資料」單案終於有結果,佢只係要畀2000蚊罰款,同埋找咗證監會嗰條大約9017蚊嘅調查費用就得嘞。
點解只係畀咁少?通告引述裁判官話,認同張志勇喺09年6月減持李寧股份但未作披露只係疏忽,亦相信佢係無意隱瞞資料,所以咪判罰咁少錢囉。
李寧董事局亦相信佢係無心嘅,認為裁決並唔會影響張氏履行行政總裁同執行董事嘅資格喎。
咁又係,若果俾李寧揀,到底要追究點解靜雞雞減持雞碎咁多股,抑或要搵人抵抗其他品牌來犯,相信李寧會揀後者囉。