姚子羚同陳瀅今日都同蕭正楠喺上環開工，姚子羚話噚晚見到蕭正楠同黃翠如嘅場面覺得好冧，但就話：「佢個死嘢，都冇話畀我哋知，我有留言喺兄弟姊妹去旅行個group恭喜佢，佢真係收得好埋。」姚子羚仲話大家去完瑞士，又合作其他節目都唔察覺，又爆蕭正楠係一個好sweet嘅老公：「佢好照顧翠如日常生活，例如有時聽到佢講電話，話整咗乜嘢食物，你記得食，好錫太太。」

姚子羚再爆同蕭正楠合作時常放閃，仲話記得佢哋一齊去瑞士拍攝，蕭正楠一打開個篋，裏面放咗翠如張相。至於會唔會送上禮物給兩人？姚子羚話：「佢都冇請我飲，仲要我送禮物，或者之後約埋大家兄弟姊妹一齊食餐飯啦。」而蕭正楠比喻曹永廉係老竇，姚子羚係細妹，但呢個細妹就全不知情，姚子羚話：「佢真係冇同我講，阿廉輩份高好多，如果佢都唔知就真係要檢討吓。」

陳瀅對阿蕭送上恭喜，覺得好難得拍咗拖咁耐都咁有火花，好羨慕呢一對，戥佢哋開心。

精選娛聞，喺晒《娛果》
http://fb.com/appledailyent