傳媒日日話羅范椒芬（FannyLaw）會調職，去接廉政公署黃鴻超個專員位，但係只聞樓梯響，中央仲未有公布。唔講唔記得，老廉個位要由中央確認，屬主要官員，非常巴閉。
八方問羅范對頭人教協會長張文光有冇所聞，佢就收晒口唔肯多講，慌死講多句激襯小氣煲呔，會收回成命，留番羅范喺教統局做常秘，令佢受多幾年難。
調羅范其實冇驚喜，佢係公僕，係全能嘅AO，一早就應該要起身，有乜理由做咗八年，由教署署長到教統局局長到教統局常秘都冇郁過，教育改革幾大件事都唔使由一個人由頭做到尾，加上佢阿姐講嘢實在有欠技巧，永遠喺唔適當嘅時候講唔適當嘅說話（例如教師自殺，佢就反問話如果因教改而死點解淨係兩個呢？），簡直同唐唐有得揮，所以煲呔為咗要順利連任，係時候要執吓位，收埋佢，等佢唔好講錯嘢，咁去老廉最啱數。

政務主任中排行第一

Fanny嘅公眾形象甚差，但係有公務員認為佢好掂，好盡心盡力，好似佢嘅前上司林煥光就覺得佢冇得彈，所以當年提佢上位當署長。有個別AO仲話羅范瓣瓣都掂，當然教育界就唱反調，笑佢瓣瓣都理吓，但係瓣瓣唔掂。
羅范今次調職真係考起煲呔，因為排資論輩，除咗俞姐（佢暫時離隊去咗做問責局長），Fanny喺政務主任中排行第一（跟住係黎年、尤太、李淑儀同何宣威），如果好似向民主派議員認低威，佢哋會好冇面，況且范家深得中央信任，佢大佬范鴻齡入咗行會，當年老董未坐正，Fanny就借調去做特首辦主任，有人提過會由佢做公務員事務局局長，負責睇住特區政府人事調動，即係好似大陸嘅組織部部長，後來不了了之，俾王永平做咗。