「買樓」係家陣同朋友食飯飲茶，必定會傾到嘅話題。前幾日同朋友飲茶，又係三句唔埋就講到買樓嘅問題。
話說朋友準備結婚，早幾個月同女友響港島區買入一個單位，兩個人都係中產階級，有番咁上下積蓄，所以即使個單位樓價唔平，但兩個人錢銀算鬆動，寧願首期畀多啲。朋友係半個生意人，即係有份穩定嘅工作之餘，自己響出面都有搞啲小生意，私人響大角嘴區開咗間公司。佢熱衷投資，由於經常響大角嘴出入，見嗰度一幢舊樓，樓價升幅跑輸其他地區嘅物業，認為可以炒落後，於是響區裏尋寶，諗住搵吓質素高嘅用嚟投資。

不過，佢面對一個問題，唔係搵唔到投資目標，而係資金大部份已壓在同女友一齊買嗰層樓度。由於銀行只係借到七成按揭，佢呻「應該之前買層樓時借盡啲，借到九成，咁家陣咪可以鬆動啲囉！」敏妮乘機「馬後炮」話：「家陣息口咁低，尤其按揭息率，的確應該好好把握時機。」朋友話，之前同女友諗，按揭成數太高，驚好似金融風暴時樓價暴跌，孭住大筆樓債。
其實借錢投資又唔算係罪大惡極，善用低息環境，透過適量融資增加投資本錢，係好多企業普遍又被市場認同嘅行為。加上朋友同佢女友個人財政健康，即使按揭成數高，唔係因為冇咁大個頭而去戴頂大帽，只係想留多啲流動資金，以投資角度睇，合情合理。當然借錢投資，最重要係投資項目風險唔可以太高，保本而回報可以高過融資成本，已經值得考慮。
其實朋友最怕應該係樓價跌，投資嗰層樓沽唔出，要同時孭住兩層樓嘅樓債。家陣通脹環境下，磚頭升值機會比貶值機會大，若租金回報可以cover按揭成本，敏妮覺得值博率算高。不過，既然家陣朋友嘅資金壓晒響「愛巢」，唔能夠投資另一個物業，惟有搵過其他資金需求較少嘅投資項目。

溫敏妮
http://wanmanli.com/blogs/