大班電台獲煲呔開綠燈準備大展鴻圖，正在公共廣播嘅香港電台，則斯人獨憔悴，八方聽聞噚日全台上下趁開台75周年影大合照，不過出席者都唔多歡容，鎂光燈閃起時好勉強先笑得出，事關港府殺台在即，大吉利是講句，呢幅隨時係「遺照」，試問點有心情𠵱起棚牙？
港台中人愁眉不展，另一原因係陰霾又至。曾被老董批評低級趣味，左佬指斥陰陽怪氣嘅節目《頭條新聞》，開始至今19年來，一直都編排喺TVB黃金時段播出，𠵱家逢星期日晚7點翡翠台見，點知最近高層決定，8月中起改去亞視出街；台前幕後對此安排議論紛紛，部份人更有微言，因為節目放喺無綫播，收視有18至20點，改喺ATV卻「三點不露」，咁搞法甚有「燉冬菇」𤓓味，令人質疑係咪要陰亁《頭條新聞》。

亞視高層主動要求

《頭條新聞》成日恥笑左派、保皇黨，對民主派好似較客氣，有人陰謀論咁話，今年9月立法會選舉，喺8月作出上述調動唔似巧合咁簡單，而且每年9、10月左右，港台都會重新洗牌，再編排節目喺兩個免費電視台嘅播出時間，唔等多個幾月就匆匆調動節目，係咪不太通情達理呢？
江湖傳聞，今次係亞視高層主動要求港台將「王牌」節目調去ATV，《頭條新聞》咁好睇，冇理由19年嚟都益無綫嘅，點解唔畀隻好牌ATV呢？港台高層係通情達理嘅人，對業界意見當然從善如流，順水推舟解決問題。港台發言人表示，《頭條新聞》調去亞視播出係正常安排，節目仍然會以嘻笑怒罵方式討論時事問題，至於內容有冇改變，由製作人員決定。發言人又話稍後會再編排節目播出時間表，會否改回無綫播出暫未決定。
主持人之一吳志森同八方講，節目播出安排唔到佢話事，只知佢同曾志豪、林超榮會繼續留低，節目內容亦冇特別變動，至於係咪俾人「燉冬菇」，佢咁答：「ATV係少啲人睇，幾十年嚟都係咁，冇辦法。」超人噚日人在泰國，佢話未知上述安排，知道詳情後先做回應。
mailto:[email protected]