當年今日
關於我們

中環在線:茵姐銀襯桃紅 - 李華華

蘋果日報 2012/02/29 00:00


又到一年兩次嘅業績「春秋二祭」,華華當然要把握機會見吓平時難得一見嘅上市公司高層,睇吓有乜睇有乜學。曾經係內地女首富嘅玖龍紙業(2689)老闆張茵,今次再有堅嘢畀大家睇!

初見以為好樸素

話說茵姐每次出嚟見記者都會悉心打扮,「最佳服裝獎」肯定冧莊幾屆,其他人唔係老西就係行政服,真係睇到悶。昔日華華見過茵姐一身火紅,配波子咁大粒嘅珍珠耳環;又見過佢戴過火機咁大嚿嘅吊墜,每次都帶畀大家無限驚喜。噚日華華一去到記者會,見茵姐坐咗喺到一身素白,仲諗茵姐可能趕住出門口,冇時間揀衫。點知記者會完咗,茵姐一起身,華華先睇真佢一身西裝外套兼短裙,原來都係閃到爆嘅銀色,仲手挽一個桃紅色嘅矜貴愛馬仕包包,真係yeah到絕,再一次秒殺華華。