「香港亞洲電影節」今日喺尖沙嘴舉行記者會，杜琪峯、楊千嬅、周柏豪、張晉同陳嘉桓都有出席，周柏豪宣傳電影《販賣愛》，對手就有兩個靚女，就係陳嘉桓同黃子晴，陳嘉桓扮演媛交女生，咁柏豪係唔係做嫖客？柏豪就話：「唔係嫖客，我扮實習醫生，同佢係朋友做心理輔導。」問到會唔會同嘉桓有情慾戲，佢就話呢套冇緣。

柏豪又話個角色好正面同熱血：「會上街爭取自己理念，同依家熱血青年好脗合，我唔知依家佔中後生仔點樣，但戲入面我比較主動唔會偏激。」咁會唔會對依家上街嘅學生理解多咗，柏豪話：「理解，自己都曾後生過，個人立場唔想透過傳媒講，做藝人好麻煩，唔講又話唔講，講咗可能fans話早知唔嚟香港睇你演唱會，又可能同親戚意見不合。（有冇試過同親戚嗌交？）冇，但知道一定會意見不合，所以自己默默地做自己嘢。」

咁柏豪近日有冇矯裝去親身支持呢？柏豪話：「坦白講，未發生到咁大件事前，好冷靜嘅時候，自己有去金鐘停一停望吓，因為我唔相信網上嘢，亦唔相信某啲報道，我相信自己對眼，唔想有流血事件發生。（但係呢兩日越流越多血，警棍扑人）係架，唔想見到，想好和平，所以覺得無奈，冇人想發展到咁。」