退一步海闊天空,當年喺維宮睇電視見到五十萬人上街,煲呔曾經忍唔住喊起嚟,幾乎想唔撈咁話,點知世事難料,大遊行竟然成就佢嘅春秋霸業,今日輪到自己坐正,雖然都有二十幾萬人走出嚟,搞到曾慶紅喺海外都話遺憾,但有大屋住有錦鯉陪,光宗耀祖驕親傲友,話之你班泛民主派日日遊行啦。
煲呔咁叻仔,其實早知呢個位唔易做,淨係識迎合北京喜好,好似當年湊英國佬一樣行唔通,因為英國係西方文明發達國家,祖國同人哋冇得比,但係難做都要做,權力呢味嘢,有邊個放得低呢,你話呢間大屋風水唔好,畀中銀劈到正,咁你有冇得住?
所以八方都好服煲呔夠膽識,老董唔敢入住前港督府佢老哥就敢,不過,重有一樣佢應該要做埋,就係改番個正確嘅名。必也正名乎,名不正則言不順,當年振英哥哋搞個改名大會,無端端將GovernmentHouse嘅中文名由港督府改咗做禮賓府(差啲叫咗做紫廬),而家煲呔搬返去住同辦公,冇理由重叫禮賓府啫。
不過,當局就話佢哋暫時冇意改名,唔知係咪怕叫番做「特首府」,意味做特首會好苦?咁可以叫特首府邸,香港個首長住喺禮賓府,賓賓聲,咁個「主」去咗邊?
傳真︰2623-9278
電郵︰
[email protected]