每年老公生日都唔使太費神，佢為人實際又係球癡一名，買番有關足球嘅嘢就穩陣又開心，雖然老馮買波衫、波砵，但一樣可以有Surprise，佢着慣嘅石地波砵香港早喺四五年前已絕版，話明千禧版，點會喺2006年仲有倉底貨呢？不過美國有，在大前年我已經喺美國訂兩對返香港，鞋價$60美元，運費$30美元，都幾甘，呢兩對鞋喺前兩年嘅聖誕同情人節分別送出，佢一星期踢三日波，兩對鞋亦在短短兩年內TotalLost。

今年生日，唔使愁，再入貨，雖然喺外國訂返嚟價錢都幾甘，但為博「紅顏」一笑，值得！生日當晚我送上呢對心頭好千禧Samba，佢果然開心到痹，仲話唔捨得着，誰知呢個Surprise只維持咗15分鐘，因為一行到adidas專門店，笑話隨即而來，噢！久違了的千禧Samba竟然撞正呢個時候翻出，遲唔出早唔出，剛剛呢個時候出番，仲係賣$500，比我訂返嚟平得多，老公不禁笑我：「好似都唔係第一次！」我好Down，又肉痛，大拿拿買貴二百大元，好彩老公一句安慰：「算啦，心意嚟啫。」條氣順晒，我哋連忙Call班波友報告這喜訊，石地王千禧Samba翻出，因為真係好好着，班Friend喺呢幾日都入咗貨，我仲入定兩對，以備下年、後年老公生日之用。

查詢：27306685（adidas）