韓國「得意妹」秋小愛自退出人氣育兒節目《超人回來了》後，就甚少喺鏡頭前露面，不過早前小愛就孖住老竇秋成勳、媽媽矢野志保到蒙古拍攝SBS新綜藝節目《秋可愛一家出發喇》。節目於噚日首播，秋成勳及矢野志保提到演出新綜藝嘅原因時，表示現年只得5歲嘅小愛喺城市生活太壓抑、太大壓力，所以想同佢去蒙古旅行，畀愛女感受大自然及放鬆下。

節目率先播出小愛一家喺日本東京嘅生活，留咗長髮嘅小愛好以前好唔同，淑女咗好多，而且小愛雖然只得5歲，但佢已經要開始帶眼鏡，令粉絲心痛。秋成勳更感嘆地表示：「小愛即將升小學喇，睇住佢自己一個去學院嘅模樣，真係覺得變咗好多，依家(小愛)自己一個人都得。」矢野志保又指小愛一直忙於學習韓文、英文、體操、鋼琴等，同時自己及老公都好忙，儘管一家三口一齊住，反而分開嘅時間更長。