【C1頭條】無綫綠葉吳博君患漸凍人症 地獄人間三個月
薛凱琪劉德華漸凍人艾威荔景邨演藝人協會吳博君
於70年代加入無綫的「綠葉」吳博君,擅演、鹹濕佬、店小二,甚至壞人角色。97年金融風暴被無綫裁走,當年他40歲,轉行做過麵包師傅、紙紮舖及寫字樓清潔。今年61歲的博君在荔景邨跟太太互相扶持,怎知今年3月16日,博君忽然四肢無力癱瘓入院,證實患上運動神經元病(MND)。由於醫生指沒藥根治,還以為要在床上過完下半生,幸現在病情奇蹟地出現轉機,他可以再站起來,博君再次展露笑顏,日前在家中接受《蘋果》專訪細訴由地獄折返人間的心路歷程。
博君說:「開頭有少少手震,以為柏金遜,後來手同腳越嚟越冇力,瞓喺張床起唔到身,成個好似癱咗咁,叫白車入醫院。」當證實患了MND後,醫生跟他說:「你第日會冇力,目前嚟講全世界冇藥醫。」博君嘆謂:「完全癱喺張床唔郁得,頭腦仲好清醒,咁先至痛苦!我成個人沉咗落去,跌咗落去絕望裏面,直情等死咁。我曾經諗過,不如死咗去好過,手腳肌肉係咁流失,瘦到好似皮包骨。」
博君被醫生叫他出院住安老院,博君說:「安老院住咗差唔多成個月,朝朝聽隔鄰床嘅老人家嗌交,負能量好大。喺安老院其間,艾威太太介紹我食中藥,好奇怪,兩劑左右,發覺有啲轉機,可以落到地行,家叫做行到吓,今日都有返醫院做物理治療。」博君重展歡顏說:「家有少少力,勉強可以揸筷子食飯,大小便、沖涼都得,呢個病最大體會係無常,今日唔知聽日點。」博君寄語同路人:「早啲去醫,唔好咁易放棄,各方面都試吓,同時間競賽,同佢拼過,我家每日做健身,強化番自己身體。」
博君患病後跟太太都沒再工作,手停口停,問到經濟能力有否問題?博君坦言:「真係完全冇收入,我太太將情況講畀演藝人協會聽,後來協會聯絡咗麥包(麥長青),我當年訓練班同學、冇聯絡嘅都嚟探我,好似魯振順、湯鎮業、劉少君……真係走嚟醫院探我,二十三年冇見過。」
博君眼紅紅、聲震震說:「我特別多謝薛凱琪,我唔識佢,佢私人捐咗少少錢畀我,人間真係有情。藝進會邊個捐助我幾多,有張清單,睇到劉德華都有捐,大家都好有心。」還有博君的前任老闆,對他亦有情有義:「患病前最後嗰份工,喺一間公司做清潔雜務,入咗安老院,老闆應承每個月津貼我5,000蚊費用,為期兩年,我都嚇咗一跳。」他哽咽說:「世間上竟然有咁好嘅人,真係好開心,我由一個好絕望,變番充滿希望嘅人。」
不認識博君都伸出援手的薛凱琪在電話說:「今年做咗演藝人協會委員,有日志偉將呢件事通知大家,我唔識佢本人,捐咗少少錢畀佢,想佢知道有好多人愛佢。」吳博君現除定期到醫院做物理治療,亦在艾威介紹下看中醫,艾威在電話表示:「