【韓流】勝利餵湯丸冧粉絲 自言掛住BIGBANG隊友
BIGBANG勝利
韓國組合BIGBANG成員勝利 ,連同女星白冰、李笑男、王梓軒及陳鍵鋒等,噚晚喺九展出席由陳思行(陳加玲)自編自導嘅電影《宇宙有愛浪漫同遊》首映。
勝利現身吸引大批粉絲場支持,首映禮上仲播出電影嘅預告片及由勝利主唱嘅電影主題曲,著住格仔西裝嘅勝利甫現身就用發音尚算標準嘅國語同大家打招呼,引得粉絲瘋狂尖叫,而且全程都用國語喺台上介紹電影角色,仲即場清唱一段電影主題曲,又聯同更年同王梓軒一齊喺台上跟粉絲玩猜燈謎 ,勝出者由勝利親自餵食湯丸。
勝利用國語接受訪問時話,噚日先至嚟到香港無時間四出遊覽,亦無時間品嚐香港嘅美食,仲話:「現在肚子很餓。」嚟緊就係中國嘅元宵佳節,問到勝利到時會點樣渡過?佢話:「很快就要推出我的Solo Album,所以到時應該在Studio渡過,我跟工作談戀愛,工作就是我女朋友。」
講到隊友G-Dragon日前正式入伍當兵,勝利表示:「哥哥們都去了當兵,我已經很想念他們,希望馬上會和他們見面,他們休假時亦都會相約見面。」勝利又表示同BIGBANG成員們經常一齊出席活動同做演唱會,平日無所不談,所以感情好深厚。
咁喺GD入伍前有無請佢食飯?勝利笑言:「當然有,但我們是AA制。」勝利又直言自己喺BIGBANG中年紀最細,所以離入伍之期不遠:「我肯定很快就要過去找他們。」
另外久未在港演出嘅陳鍵鋒,噚晚亦都現身首映,佢話近來拍緊港台新劇《火速救兵》,稍後就要起程返國內拍電影,佢話:「今次返去演出狄仁傑,角色已經畀人演出過一千次,所以之前都要花咗一段時間去研究,同埋參考其他人嘅演出。」
陳鍵鋒又透露,自己有意演出真人騷:「我有個題材構思好,但仲未成事要好好籌備,亦仲未知究竟係香港定國內拍攝,以前一路做幕前,從未諗過做幕後策劃有咁多嘢要處理,由諗題材到搵人好多嘢要搞。」
更多韓流,喺晒《娛果》
http://fb.com/appledailyent
勝利受訪時自言好掛住已入伍嘅隊友G-DRAGON及T.O.P