星座性格我一向深信不疑，我係天秤座，做人永遠好似把秤咁，左秤右秤，要我做決定真係好痛苦，但偏偏其中一份長工就係要我不斷做決定，世事就係咁奇妙。天秤座嘅人凡事追求公平，到後來我又發現，上天其實好公平，因為世上無一件事係絕對公平。

一如既往華人倉口在季初例打快攻，剛戰（2日）十場賽事當中，有八場均由華籍練馬師勝出，馬迷不妨跟著呢條路度馬。

新任練馬師丁冠豪開鑼日起孖兼上頭條，今次當然會繼續攻勢，明刀明槍希望省靚招牌吸引更多新馬加盟。我較喜歡第一場「飛壹般」，試閘有前有後貫注力十足，相信可以為丁廐延續威勢。

此外要留意尚未開齋的何良馬房，今次呢手馬不乏爭勝份子，其中第四場「艦長天下」上季尾始見走勢，北半球馬預計今季表現會更進步，季初試泥閘見田泰安稍稍拍鞭考驗隨即湧上，反應餘勢相當好。

半冷門可敲第七場「快樂生活」，體弱馬本來就係谷草專家，評分已減到有利水平，暑期操練正常有快跳大閘無再跌磅，跑得返計實力喺呢組絕對有優勢。

季初另一個熱話，就係韋達究竟能否翻生，第五場「快利寶」上季同程贏得輕鬆，今季復課從新做工夫，試閘韋達曲尺手再現，馬匹直路走勢非常吸引，見隻「及時行樂」一拍上來隨即走多幾步頂著對手，相信呢匹馬而家先係真正成熟，四班難留！

文：阿Kit