正所謂冇永遠嘅敵人，曼城中場耶耶托尼，今季俾新任領隊哥迪奧拿雪藏，哥帥更加要耶耶經理人道歉先會解凍。耶耶上星期道歉後，事件都終於平息，上周六英超聯賽，耶耶闊別六個幾月先喺聯賽上陣，不過佢都冇揸流攤，曼城呢場拎到三分真係靠晒佢，作客水晶宮，39分鐘接應洛尼圖回傳，禁區頂撞射建功，雖然主隊一度由域咸下半場追平，但完場前七分鐘耶耶接應奇雲迪布尼開出角球，近門建功，曼城險勝2:1，避免連續兩場失分，哥帥真係要多謝耶耶。不過耶耶賽後就冇直接回應哥帥，只話自己練習期間，都得到好多隊友支持，球隊能夠繼續爭標都好開心。

熱刺補時反勝韋咸

至於熱刺上周六主場險勝韋斯咸，都要多謝救星哈利卡尼；熱刺呢場就以雲遜贊臣做正前鋒，哈利卡尼墮後策應，但雲遜贊臣呢位荷甲神射手認真唔掂，熱刺更一度落後1:2，終於要由迪利阿里入替贊臣，卡尼打番前鋒，先好番好多，結果卡尼89分鐘追平，補時階段射入12碼，熱刺戲劇性反勝3:2，終止聯賽四連和。