現時練馬師榜形勢，蔡約翰有66Win大比數帶頭，足足領先次席羅富全23場頭馬，隨時第十度封王。排第二位嘅羅富全暫時只多第三位沈集成2Win，後者近期氣勢十分旺，越追越近，大有趕過頭之勢。

近排除咗沈集成外，仲有一個馬房表現非常省鏡，所指正係目前排緊第六位，一向係傳統勁旅嘅告東尼。

告東尼剛啱夜馬賽事（28日）起孖兼捧晒兩項錦標（義勇軍挑戰盃及跑馬地銀瓶），認真威水，而且自3月14日開始，馬房已連贏五個賽日，氣勢之盛絕不比沈集成遜色。

今次復活節賽期（4月2日）告東尼不乏爭功機會，如第三場三班1200米草地賽，較質新的「禾道駒」上賽突放頭走，頗有試馬味道，今次隨時益到徒弟仔蔡明紹；另列陣第十場三班1400米，季內跑草地演出十分穩定之「劍聶風」，上仗泥地大敗，再一次證明泥地不合腳法，表現難作準，重返草地小心變身。