當年今日
關於我們

  《蘋果》又食死貓 - 李八方

蘋果日報 2002/01/17 00:00


入境處長李少光被居權問題搞到頭都大晒,前日突然話有人以金錢利誘部分敗訴者留下,呢種行為應該受到譴責云。
嘩!邊個咁大膽挑戰終院裁決呀?八方噚日睇《大公報》老友記關昭文章,當堂嚇窒咗,關大姐以近乎明示嘅暗示,令人一睇就知道,係《蘋果日報》刻意刊登七十五歲李希儒與卧牀九旬病父淚眼看淚眼嘅圖片,再發起募捐,結論梗係話我哋別有用心啦!
唉!登張有人情味嘅新聞相會俾人話「製造人間悲劇」,咁係乜道理?八方又詢問曾經訪問李伯嘅記者,有冇人講過畀錢叫李伯留低,查實係冇。講到捐錢呢樣嘢,原因係連日有讀者來電表示想幫助李伯生活,對好多需要幫助嘅人,《蘋果》都會發起募捐啦!
八方愈諗愈唔妥,打電話去入境處搵李少光嘅公關要員仙蒂徐,想同佢講清楚件事,仙蒂夜後覆電連聲話係誤會,「處長唔係針對你哋,不過佢好擔憂行使酌情權嘅事情」。
至於關昭大姐,八方都好想同佢說明一下,遲啲啦!不過,如果佢以後要批評《蘋果日報》,可以唔使寫「某報」咁含蓄,《蘋果》都唔識告人嘅。
另外重有補充,李希儒噚日接受記者訪問時候講:「我嗰日見到父親流眼淚,我好心痛,所以決定留低。」李伯又話《蘋果》記者曾經送一把罐頭刀畀佢,但經了解,送罐頭刀嘅其實係其他報館嘅記者。


E-mail:[email protected]