仲有7個幾月就係立法會選舉，各黨派磨刀霍霍。自由黨今屆將上演「王子復仇記」，勢要重奪失落嘅直選議席。上屆曾打算轉戰直選嘅黨主席劉健儀今屆大有機會一嘗所願，落戶港島玩直選。佢噚日趁新春團拜同八方講，今年去咗好多地方寫揮春，去得最多就係銅鑼灣。言下之意，唔使多講。

民建聯同鄉事派唔啱key係人都知，自由黨當然唔會放過鄉事派呢條大水喉。榮譽主席田北俊話，自由黨同鄉事派有偈傾，佢哋好尊重新界人嘅丁權，因為係受《基本法》保障，但係新界人嘅僭建，佢就真係撐唔落，但亦都唔會支持一日拆晒啲僭建物。睇嚟田少要重奪新界東議席機會大增。
同樣都係搶佔建制派中產嘅新民黨又點呢？主席葉劉淑儀噚日話好鼓勵副主席田北辰出戰超級區議會，仲話二人合作至今一年多，粉碎當初「火星撞地球」嘅分手預言。
一路打算強攻新界西嘅田二少心大心細，因為上屆立法會，九西同樣有5個位，但佢最終敗北，睇嚟冒唔起再輸風險。八方又聽聞民主黨九龍東，等上位多年嘅黃大仙區議員胡志偉，今屆將擔大旗排頭位，排名單第二則同樣是該區區議員兼律師黃國桐。