資深藝人米奇（吳振東）本月8日因心臟病離世，享年79歲。其家人噚日為佢喺寶福紀念館寶德堂設靈，今早10點出殯，遺體移至哥連臣角火葬場火化。噚日前往致祭的包括其好友、「香港動作特技演員公會」成員張永漢同「大師兄」徐忠信，吳振東嘅太太就着上喪服、戴口罩同黑超現身。
靈堂佈置簡約，堂中央嘅橫匾寫上「福壽全歸」，靈堂前就擺放太太余丹所送嘅「痛失良伴」花圈，其他致送花牌嘅藝人包括古天樂、曾志偉、任達華、錢嘉樂、肥媽、姜皓文（黑仔）、黑妹同煒烈等。喪禮以道教儀式進行，費用由「香港演藝人協會」同「香港動作特技演員公會」負責。

徐忠信話：「上星期喺新疆拍完包青天返嚟知道佢走咗，都相識30年。」張永漢就話一直有探米奇，又話米奇入院兩、三次，之前係氣喘入院：「佢本來狀態好，第二日就好似植物人咁，走時都好安詳，太太有陪住，但後期唔認得人，連我都唔認得。」
同米奇識咗20幾年嘅黑仔就話，啱啱入行米奇就帶佢去Disco，因為間間都識佢，所以次次唔使畀錢。問黑仔有冇喺佢晚年探佢，佢話：「有，佢未入老人院之前好精神，去三門仔飲茶，又去大埔燒嘢食，到4月金像獎前都有探佢，都仲認得我，但唔係咁清晰，知佢成日出入醫院。」
撰文：馮仁昭