組合ERROR成員何啟華（阿Dee）、郭嘉駿（193）、吳保錡（保錡）、梁業（肥仔）主持ViuTV節目《ERROR自救TV》，會接受不同挑戰候命，昨晚主題為「保錡個人自救計劃」，邀請到「薯片叔叔」、前財政司司長曾俊華上節目，由保錡單人操刀以自我「MK式」訪問他，保錡明顯被曾俊華氣場嚇窒，緊張到想嘔坐立不安透大氣，訪談期間又口窒窒講錯說話兼唱錯歌詞，多次腦筋不懂急轉彎，相反曾俊華十分貼地完全理解「MK式」笑話，與年輕人溝通又識講「爛gag」，還不分界限即場jam歌，完全投入節目氣氛。

其實早在2017年曾俊華成為特首候選人時，曾在選舉論壇中妙語連珠寸爆當時同樣競選，現任行政長官林鄭月娥，曾指她「講咗當做咗，林太太多嘢爛尾收場....今時今日巿民唔會再相信語言偽術。」又曾指若林鄭當選「3低特首，率領3低政府，未來5年會好難受，低民望，低能量，低認受性。」當時曾俊華言論已獲巿民大讚夠貼地，亦是現今社會現像。

曾俊華踏入錄影廠時保錡粗枝大葉上前撞手踭示好並大呼：「一世人兩兄弟，有你有我，有今生冇來世，開心搞掂佢。」曾俊華笑笑口︰「係咪可以唔開心咁搞掂佢呀？」之後還稱讚保錡着得好靚仔，此時保錡在緊張背稿，曾俊華反安慰他唔使緊張，之後正式展開訪談，談到近月疫情家中工作，曾俊華說：「呢幾年我都work from home，但有啲嘢做唔到，例如教劍（指劍擊）。」保錡好奇問「咩劍？」曾俊華說：「劍就劍囉。」其後曾俊華透露有出書，保錡大膽問對方攞書，曾俊華笑說：「你未必睇得明喎，唔係初級版。」在場即傳出笑聲。

保錡再談及到大家可能覺得我比較年輕，其實我快步入中年，曾俊華語帶諷刺說：「你一啲都唔似60歲喎，近期有局長話去到60歲先係中年，你一啲都唔似。」而勞工及福利局長羅致光曾說「60歲是中年」惹起爭議，對時事不太熟悉的保錡再次應接不下，即轉移下一問題講述自己在電視台工作又要玩笨豬跳，又要食昆蟲好博等，曾俊華風趣問他：「你哋受過特訓？」在背後其他成員見保錡失禮終忍不住亮相幫手，隨即向曾俊華道歉指知道保錡唔OK，曾俊華講爛GAG：「你姓吳嘅咩？」之後肥仔一輪嘴力推組合新作後拋出一句：「我哋唔好講廢話。」曾俊華反寸他：「原來頭先啲係廢話，OK明白啦。」令大家爆笑。隨後保錡在曾俊華要求下自彈自唱《浪子心聲》，可惜睇住歌詞都唱錯。

保錡事後表示希望用自己獨有方式主持節目，坦承有緊張，幸好最終也達到效果，難得被曾俊華窒感開心：「好開心可以訪問大人物，佢好玩得份人好貼地，咩都可以傾，我哋又會互窒吓，冇乜長輩可以咁，完全冇架子同代溝，我哋傾偈知佢以前夾BAND聽歌超潮，香港人要學吓open mind，咩國家歌都可以聽，香港唔係只得pop music。」

-----------------------------

打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新