日本殿堂級組合安全地帶即將喺本週六於亞洲博覽館舉行35週年紀念演唱，今日樂隊全體成員，包括主音玉置浩二同太太青田典子就嚟到香港為演出做準備，玉置同太太喺機場接受簡短訪問期間，有數十名Fans接機仲送上鮮花。

玉置透過翻譯表示，今次嚟香港三日，由於行程緊密未有時間四出遊覽，問到有無時間同香港朋友包括譚詠麟等會面？玉置就話：「時間太緊密安排唔到，但會向佢哋送上問候。」兩年前玉置喺香港開騷，喺演唱會上曾經用廣東話唱出一小段李香蘭嘅歌詞，問到今次會唔會再唱多少少廣東版歌詞？佢好鬼馬咁亨咗兩句張學友嘅「月半彎」歌詞出嚟，跟住就話：「Little Bit，或者到時會唱少少。」

同時玉置又透露揀選喺香港開35週年演唱會嘅原因，佢話：「因為當年安全地帶第一個海外表演就喺香港，所以今次海外演出都揀返香港。」亦直言自己好喜歡香港。今次行程咁緊密，同行嘅太太青田典子對於無時間周圍遊覽會唔會失望？青田話：「的確有少少可惜，但要做演唱會無辦法 。」

今次就35週年紀念，問到五年後40週年會唔會再搞巡迴演唱？玉置講笑話：「如果仲有命嘅話當然會繼續啦。」玉置明年就踏入60歲，但玉置話暫時未有特定計劃或慶祝活動。訪問後玉置就同太太加埋四位隊員一齊影大合照，表現親民嘅佢不停向Fans同傳媒微笑揮手，然後由工作人員陪同下離開機場。

更多娛聞，喺晒《娛果》
http://fb.com/appledailyent