港股喺聖誕節前各自各精采，一隻越南河粉股由2蚊炒到上17蚊，大笨象亦忽然變成小飛象，不過講到最值得留意嘅，始終係大孖沙嘅動作，而近期最多動作嘅，肯定係「超人」李嘉誠。長實地產（1113）噚日再度回購股份，公司年初至今已經斥資13億元進行回購。
上市公司回購公司股份後，會將股份註銷，令股票總數減少，從而推高每股盈利及每股資產值，市場一般將公司回購視為好消息。「大笨象」匯豐控股（005）咪就喺今年8月宣佈計劃大手回購，所以刺激公司股價拾級而上。

上次回購　股價升一成

政府自從上月初宣佈加辣之後，地產股都冇乜運行，加上市場預期美國下星期加息，投資者更加唔敢追入地產股，超人偏偏喺呢個時間，兩度回購，本周二係咁易拎1.07億元回購後，噚日再拎5.2億元回購，一星期合共斥資6.3億元回購。連埋上半年三度回購，至今花近13億元回購。值得留意係，長實地產今年3月同5月回購後，股價都喺短時間內升逾一成。
其實，超人近期嘅動作又點止回購，長實地產上星期先至向長和（001）買入飛機租賃業務，長江基建（1038）又幾百億收購一個澳洲能源基建業務，而長和早前亦斥資近2億元回購，超人年尾流流咁多動作，絕對值得市場follow。

李華華
mailto:[email protected]