周秀娜同鄧麗欣（Stephy）今晚去到觀塘出席電影《女士復仇》一個叫「女士復仇班」活動，分享10萬個激嬲男友理由。Stephy話：「啲男仔經常好似好難理解女仔。」係咪覺得男仔幼稚？佢話：「唔夠膽咁講，可能有時女仔都幾麻煩，自己又唔講清楚，要人估中自己心目中諗乜嘢，估唔到又嬲。」問Stephy係咪覺得男人比較蠢，佢話：「都唔夠膽咁講，可能女人諗嘢比較複雜。」

娜姐就話對住男人樣樣嘢要講得好清楚，有時唔講清楚反而會激親自己。講到余文樂今日結婚，Stephy話：「人哋send俾我睇先知，恭喜佢，好戥佢開心。過往都有同樂仔合作過3、4次，同樂仔同一屆出道，見到佢有呢個生活好開心。」

問到佢同一屆嘅個個都結婚，自己唔係好傷心咩？Stephy笑話：「自己好大愛嘅。」問係咪o依家拍拖結婚普遍都會公開？Stephy話：「係呀，其實冇乜必要隱瞞，o依家大家都唔介意，同埋唔會影響事業，反而令事業更加好沁㖭。同埋得到大家祝福更加開心。好認同樂仔講喺適當時候遇啱適當嘅人。」問佢點解咁唏噓，佢話：「唔係，不過好戥對方開心同埋認同。」

娜姐話冇同過樂仔合作，但都戥對方開心。對於Stephy認同樂仔所講喺適當時候遇到適當嘅人，娜姐笑住話：「唔好再問，因為我都覺得好啱囉。」

更多娛聞，喺晒《娛果》
http://fb.com/appledailyent