朱茵今日凌晨4點幾喺微博晒閨蜜相,朱茵喺微博留言:「姊妹情深,陳法蓉、蔡少芬、洪欣。」人妻朱茵自大前年幫老公黃貫中(Paul)生咗愛女黃鶯之後,近年一直專心喺屋企相夫教女,好少見佢公開現身,原來一班好姊妹噚日一齊同洪欣細女彤彤慶祝一歲生日。
洪欣上年2月為老公張丹峰生咗囡囡張晞彤(Yannes),眨下眼就一歲喇!噚日化身小公主,由爸爸媽咪陪佢切蛋糕,再同一班媽咪嘅朋友影相,洪欣更成程攬實囡囡,Ada亦喺微博貼出同大女「小湯圓」嘅咀咀相,果然係成場散發出「母愛」!
好友蔡少芬喺微博留言:「今天參加張丹峰&洪欣女兒生日!小美人越來越美麗動人!真想咀咀!願主保守小美人健康美麗快樂活潑開朗樂觀好動溫柔敦厚成長!恩典大大大大抱擁左右上下!每個人都愛她!」另外,陳法蓉亦寫道:「祝彤彤1歲生日快樂,快高長大,孝順父母,日日快樂!年年健康!」