足球電玩《FIFA 18》今個月就會正式推出，生產商EA Sports開始逐步由尾數上嚟咁滲出能力值頭100位嘅球員名單，家下已經數到31至40位嗰批球員，車路士防中尼高路簡迪嘅能力值就大幅提升，已經去到87，同同胞保羅普巴平起平坐，而佢喺《FIFA 17》時，就只得81。

升得咁多，係因為簡迪基本上每個項目嘅能力，包括速率、盤扭、防守能力、傳球同體能全部上升，但射門能力方面就冇變，都係得66咁多。

簡迪被讚喺球場上嘅活動範圍驚人，有人誇張咁話如果地球表面70%係海洋，咁佢可以覆蓋淨餘嘅30%。好多網民對於《FIFA 18》今次嘅能力值表示認同，甚至有人覺得佢應該高過普巴。