由張赫、李荷娜及金材昱主演嘅韓國收費電視台OCN人氣劇集《Voice》，去年播出時贏盡口碑及收視，劇組之前已宣佈會開拍第二季。

當中張赫及金材昱都唔會出演第二季，而女主角李荷娜就會繼續留低，至於男主角方面早前已傳出因為賣座電影《與神同行》而人氣急升嘅男星金東旭，有望演出第二季《Voice》，不過就只聞樓梯聲，直到今日韓媒就再報道，前年曾捲性侵案嘅《愛你的時間》男星李鎮旭，有望擔正《Voice》嘅第二季，李鎮旭去年低調復出接拍新戲新劇，現時熱播嘅《Return》令佢成功翻生。

另外，韓劇《W》男星李鍾碩將會出演SBS特別劇集《死之詠贊》，呢齣劇將播出兩集，係翻拍同名電影，以朝鮮時期女高音歌唱家嘅故事作藍本，李鍾碩喺劇中將飾演天才作曲家，據了解今次李鍾碩係唔會收取劇酬，事關佢一直都好想演出獨幕劇，所以今次答應零劇酬出演劇集。

而今日韓媒就報道李鍾碩同所屬嘅YG事務所合約期滿，李鍾碩於前年5月10號宣佈加盟YG，今年雙方合作第二年，據了解雙方仍就續約事宜商討中。

更多韓流，喺晒《娛果》
http://fb.com/appledailyent