有個所謂網紅畀賊入屋打劫，不知是否懸紅二百萬的關係，警察竟然迅速破案，不但拉到幾名疑犯，而且起回部份贓物。新聞登上報紙，凡事政治化的花生友不熱烈表揚PK鄧領導有方不特已，還紛紛質問點解調查元朗七二一白衣人又唔見佢哋咁勤力，太冇人情味了。同樣是看熱鬧，唯物主義者比較留意那批失而復得的名牌手袋，見到照片不禁嘖嘖稱奇：有人買咁肉酸嘅嘢已經非常難得，居然仲有笨賊搶，唉，出嚟做世界唔該醒目啲啦，核突到咁，點脫手啊老友，就算拎去平民舞廳向跳老舞的阿姨廉價兜售，睇怕都門可羅雀，怪不得手錶順利典當，包包無人問津，要埋晌山旮旯。不過最震驚的是有一張當事人社交平台截圖，主題乃一疊疊銀紙，炫富去到這麼原始這麼赤裸的程度，失敬了。之前有網民幸災樂禍拍手稱快，「都話咗㗎啦，成日貼相晒冷，果然引狼入舍，抵佢死」，宅心仁厚的我不以為然，不經大腦「咪咁憎人富貴好唔好」衝口而出，有圖有真相，不得不承認是我錯。

今年廿零歲的網紅，自稱由零五年開始接生意，錢是自己一分一毫捱返嚟的，點樣用無人有權置喙，「名牌店就係畀人買嘢，買嘢就係攞嚟用，用得就係攞嚟影相，影相就係畀人睇」，邏輯雖然滑稽，到底有種新生代錢瑪莉氣派，若果出現在亦舒小說，怕且被粉絲供奉為金句。然而十歲就在社會打拼，做的究竟是什麼工作，財源怎會如此滾滾，都幾引人遐思，警方起碼應該跟進調查有沒有觸犯國安法吧？而且兒童不是有法律保障嗎，此姝父母是否將女兒當搖錢樹，蕭芳芳姐姐，做嘢啦！