當年今日
關於我們

AV藍:做定功課等買泰林清倉貨

蘋果日報 2008/11/08 00:00


小藍近排最關心係泰林幾時減價清倉,想平平哋執番部高清電視玩吓。泰林臨時清盤人之前話會喺呢個月嘅周末開倉,但到𠵱家仲未有消息。
港九電器工程電業器材職工會技術總監孫名林教路話,因為好多貨品都係陳列品,消費者想買到啲好嘢,一定要事前做番啲工夫。第一要諗清楚想買啲乜嘢,有咗目標嘞,要出街巡吓呢啲貨品嘅巿價先好去尋寶,「應用巿價做標準,你先知啲清貨產品抵唔抵買。」
「俾人摸得多好易壞」
孫名林話,購買高清電視機、電腦顯示屏、Notebook同手提攝錄機特別要小心。因為呢啲陳列電器喺店舖插電開機都有一段時間,會出現損耗,而貨品又冇咗保養,購買嗰陣要考慮埋呢點。「但係究竟陳列咗幾耐,真係斷估,當然部機型號越新,損耗應該越少。」
孫名林提醒小藍,購買陳列手提攝錄機同數碼相機都要小心,因為呢啲機經常被啲客試,「呢啲電子機俾人摸得多好易壞,選購嗰陣睇吓部機嘅邊位,啲邊位越滑即係被人摸得越多。」
至於雪櫃、冷氣機呢啲大型家電損耗性問題大不,但買冷氣機要留意額外畀錢裝機,好似分體機要成二千幾蚊,消費者要自己衡量一下。
逢周六刊出