今年新晉女子組合《少女標本》今日黃昏時候，去到屯門龍鼓灘取景拍微電影，隊中成員許雅婷（Kabby）、溫心、袁紫僑（Coco）同簡淑兒，各以不同造型現身，當中最為性感係大露背嘅Coco，而溫心騷長腿、Kabby露肩，較為保守的簡淑兒則騷演技。

故仔講述簡淑兒同好姊妹Coco、Kabby散步時，竟然遇到另一好友溫心搭上自己男友，當場撞破男友有外遇，簡淑兒即場谷出眼淚，而造型Cool爆嘅Coco即上前質問男方，身為第三者嘅溫心，順勢掌摑賤男，而Coco亦不甘示弱上前摑多下，最離奇是四女竟成好姊妹一齊結伴離開，留下賤男一人。

現實生活有冇遇過男友有第三者？簡淑兒話：「梗係有，當時仲只係識喊。」Kabby就指後悔當初冇好似今次微電影中咁掌摑男友，佢亦指嚟到海邊取景，都好易觸景生情，所以要工作人員幫手控制情緒。嚟緊呢套微電影會有佢哋四人各自新歌MV，四人會互相穿插各人MV演出，今次微電影係錄Kabby新歌部份。