練馬師沈集成早排於馬房範圍內用粗口鬧獸醫,過程畀人偷拍,傳來傳去放咗上社交網絡。事件曝光後,馬會進行研訊,裁定沈集成行為不檢,罰咗佢七萬五千大元。所謂知恥近乎勇,沈集成呢晚連場出擊,結果直至第七場三班一哩,終於取得成果。
今場沈廐雙龍出海,閘前「金滙龍華」同「為食仔」都着綠燈落重飛,卒之「金滙龍華」在郭能胯下近乎由頭帶到尾,6.5倍win順利開出,五歲馬跨季近六戰谷草一哩全入三甲,騎練亦雙雙打開今季勝門。
「金滙龍華」馬主百億富豪謝國輝,其太太金沛橋有匹呂廐「國粹精華」亦跑今場,但直路「金滙龍華」封死內欄「國粹精華」,自己人阻自己人,搞到後駒只得第七。
至於大熱門「根深柢固」,追極都追唔到「金滙龍華」只得第二,柏寶繼頭場「盈喜悅」後再做二奶,傷癒復出敲響唔到今季勝鼓。第三名由「風采」如飛殺上奪得。「駿將」及「威利飛越」平頭第四名,四重彩因此有兩瓣派彩。