煲呔有請六十位立法會議員去珠三角一遊，兩日一夜包食包住宿，雖然封信冇寫清楚，相信各位尊貴嘅議員都唔使畀一分一毫，實行由特區政府照起晒。
八方一睇個行程表就替白鴿黨擔心，因為佢哋除咗去廣州、深圳、中山，重去埋何偉途出事嘅東莞，而且重話會喺某大酒店住宿一晚。

唔知邊個驚邊個

嗱，大陸話驚班民主派搞搞震，但係班民主派深入虎穴，其實驚嘅應該係佢哋至啱。因為係人都知祖國嘅國安同公安好厲害，可謂地雷遍布，大家一個唔小心，就會中招。話就話係立法會議員，但係唔表示個個都定力十足，何況特首辦話明，只請議員，即係配偶冇份，你話係咪好危險呀。
所以有人就建議，白鴿黨九位男子漢（包括達仔、馬丁、楊森、阿涂、阿富、張文、肥仔明、阿仁同單仲偕）嘅另一半，應該向煲呔提出，如果唔請埋佢哋做跟得夫人，就要簽下保證書，佢哋嘅老公會喺九月二十六日晚上安全回來，免得大家牽腸掛肚。如有需要，可以向同事陳智思買啲保險，八方睇怕智思兄乃念一場同事，都會勉強受保。
達仔一聽到八方友人嘅高見，第一個反應竟然係「我老婆對我好放心。」咁阿樹英姐梗係唔怕達仔出事啦，但係都要以防萬一，於是達仔就半講笑咁話，都可以諗諗唔好一個人住一間房，如果九個白鴿黨黨員住三間房，豈不是為納稅人慳番唔少錢？相信煲呔唔會反對，到時就算半夜有女子打電話上房或者敲錯門，都有人證。

打橋牌打到天光

再唔係，都可以諗吓同馬丁、楊森以及張文四個人打橋牌打到天光，就包保冇事。阿達越講越有諗頭，反而馬丁同肥仔明就話唔使太擔心，佢估既然係出得煲呔特首個名請，「就應該唔會陰你」，馬丁好希望可以一人一間房，好似以前做起草委員咁，因為如果不幸位同房好大鼻軒聲，就成晚冇得瞓，而肥仔明就話唔應該咁cheap，要兩個人同房。
當然最後冇辦法，就只好自費攜眷以保清白。
點都好，今次破冰之旅一定十分轟動，祖國各單位一定會小心行事，車隊所經地方亦必定有人開路，住嘅酒店亦會加強保安，啲流鶯好難有機會埋身啦。不過，班議員都唔係初哥，雖然有啲十幾年都未踏足過祖國大地，但係都應該知道酒店房間並不安全，有人就曾經用探測器喺房裏面試吓，果然有反應，至於電話就更冇保證，總之執生啦。
如果重有唔明解，出發前可以請何偉途講番個talk，教吓大家點樣可以保護自己，以及一旦被擒，如何甩身，八方肯定爆show。

傳真︰2623-9278
電郵︰[email protected]