間接令羅馬執番1分
求驗客手記:哥連拿「吹㷫」意甲聯

蘋果日報 2002/04/09 00:00


多得光頭球證哥連拿,搞到意甲聯賽季尾變得緊湊!話說國際米蘭響禮拜日大意失荊州,衰咗畀阿特蘭大,令榜首領先優勢稍減,前列三隊重要為錦標爭崩頭。至於羅馬對威尼斯完場前連獲兩個十二碼,至可以執番一分,賽後即引起廣泛爭議。
雖然我求大俠無光頭球證嘅專業知識,唔敢斷定佢啱定錯,更加唔敢推論球證有無偏幫成分,但總覺得第二個十二碼都幾值得商榷,看官可自行判斷。
點都好,羅馬攞到一分,對爭標形勢影響好大。咪睇小呢一分,近年決定意甲冠軍誰屬,往往係一分之差。相信餘下羅馬同祖記分別對AC米蘭嘅大戰,氣氛亦會更加緊張,球迷有眼福囉!

古柏錫住哨牙度
國米前日輸畀阿特蘭大,據聞無份落場嘅朗拿度賽後粒聲唔出,表現得好𤷪𤺧,似乎怪最近同佢傳不和嘅教練古柏唔派佢落場。不過話時話,國米落後巳經咁緊張,阿特蘭大班守將重要踢到咁辣,派朗拿度出去咪盞叫佢去送死同埋做代罪羔羊。睇嚟古柏根本重好錫住哨牙仔。

兵工廠買荷蘭孖寶難信
英國《太陽報》前日爆咗單獨家新聞,話阿仙奴會喺今夏用二千五百萬鎊買晒恩浩雲嘅荷蘭國腳賀夫蘭同尹邦美,但我求大俠就好質疑呢單料嘅真確性。事關《太陽報》一向都以漁翁撒網嘅方式嚟報道所謂獨家新聞,就算十單中得一單,都要做得到人冇佢有;加上阿仙奴一向喺球員轉會上都唔算闊綽,所以單料暫時唔太信得過嘞。
皮亞斯急流勇退
前英格蘭國腳皮亞斯話就算下屆陪曼城一齊升上超聯,都只係會做教練,唔會繼續落場踢。事關呢位三十九歲老人家話一來自己經已冇咁嘅體力,二來又唔想同啲後生仔爭,呢位硬漢懂得急流勇退,我求大俠祝佢有更好發展。

萊利硬淨無懼風雨
熱火今季輸到一仆一碌,早有傳言話型佬教練萊利烏紗不保,但佢噚日輸畀湖人後重懶風騷對記者講,球隊總裁冇計劃炒教練魷魚。鬼咩!佢自己就係熱火嘅總裁兼教頭囉,梗喺唔會自己打爛自己飯碗啦!不過老實講,萊利的確係有料之人,如果唔係嘅話球員同班主早就飛起佢啦!