韓國男子組合N-Sonic今日喺大埔舉行「拍手會」，同歌迷近距離接觸玩遊戲，眾人甫出現分別用英文、廣東話、普通話打招呼，而活動其中一個遊戲要粉絲蒙眼估樂隊成員把聲，贏咗可以得到N-Sonic從後擁抱。

跟住另一個遊戲，粉絲要估佢哋邊個胸肌最大，即場度身，BongJun38吋最大。估啱嘅人得到金秀賢表弟Zion從後擁抱好開心。之前N-Sonic成為首隊韓國隊伍打入印度巿場，喺當地開騷，剛過去嘅星期一，佢哋喺韓國獲總統朴槿惠總統邀請同印度總理莫迪晚宴，JHeart話:「可以參與呢個晚宴感到好榮幸，朴槿惠總統同莫迪總理都好友善，大家都好好傾，過咗一個愉快晚上。」

問到N-Sonic覺得印度粉絲如何，佢哋話:「喺當地見到好多靚女粉絲，但始終覺得香港粉絲靚啲。」另外，金秀賢有份演出嘅新劇《製作人們》，N-Sonic話都好希望參與劇集演出，做男主角或配角都冇所謂，已準備好拍劇。