【異動空間】儲局太鴿嚇壞市場？（魏力）
蘋果日報 2020/06/11 20:00
魏力
鮑威爾拋出一句「無考慮過加息」
美國聯儲局議息聲明話你知，未來3年維持零息，鮑威爾甚至拋出一句「無考慮過加息」，另確認會維持目前買債步伐，真係鴿到出晒面。有記者問到咁印錢法，會唔會引爆資產泡沫？鮑老回答仲震驚：即使資產價格太高，當局都唔會暫停支持經濟的措施。這形同跟大家講：快啲入市，有買貴無買錯！
以為狂放鴿市場會受落？投資者就唔係咁睇：5月就業數據已見底回升，經濟逐步重啟，武肺疫苗又全速推進，目前咁嘅牌面，美聯儲救市點解仲好似3月份咁重手？當局有無大鑊嘢隱瞞緊？結果成個格局就變「好消息出貨」。再說，負利率、控制債息曲線呢兩個市場期望均落空，可能令人失望沽貨也說不定。
執筆時美期隊緊2%，港股亦急插逾500點，回到23,600至24,600的橫行範圍，情況有點不妙，特別是舊經濟股份如金融、資源、石油股等，炒上全賴市場氣氛及游資湧入，基本因素欠奉，道氣一洩就玩完，有權直插無水花，如戰友倉位多呢類股份，請趕緊減持，套現等位買業績省鏡的科技、物管、醫療、教育股。
技術走勢去睇，恒指6月3日的上升裂口底部24,000點為重要支持，也是本輪升浪調整一半的水平，希望守得住。不過，3月底以來的升浪，聽聞不少基金收復失地之餘，更已錄得正回報，大幅跑贏大市（恒指年初至今跌13.2%），本月底粉飾櫥窗的機會大減，因此對下半月走勢不宜有太多憧憬，轉為炒股不炒市已是較樂觀的預期。
魏力
www.facebook.com/2012jason