「鮑魚大王」楊貫一同六個世界級廚藝大師競逐，最後以幾分之微，「影相」輸咗畀美國嘅法國菜名廚ThomasKeller，睇住人家登上全球廚藝大師最高榮譽，晉身「世界廚神阿一」地位。
楊貫一真係謙虛，認為自己雖敗猶榮，佢出席完法國頒獎禮後就打電話同八方「報喜」：「雖然自己贏唔到個大獎，但係接過英女皇前媳婦莎拉頒贈嘅廚藝大師精英獎，都覺得好光榮。正如莎拉話，七個獲提名廚藝大師，都係世界廚藝大師精英中嘅精英。」
「阿一」形容大會宣布結果時，出席頒獎晚宴嘅五百名嘉賓都估邊個會攞到呢個至高榮譽，氣氛緊張。佢講：「響美國三藩市開設餐廳嘅Thomas攞到第一，所謂識英雄重英雄，大家同佢都攬頭攬頸，影相留念。」

評判突擊　煎魚失分
關於楊貫一落敗的其中原因，有講舊年底某晚，賽會港方評判「蘭桂坊之父」盛智文一行五人，突擊到「阿一」舖頭食飯，特登唔叫佢最拿手嘅鮑魚；據了解，當時好幾味菜都難唔到「阿一」，惟獨可能係佢睇漏眼「煎烹紅海斑」交由廚房炮製，結果煎烹略欠不足失分。
楊貫一透露已獲大會邀請，一眾名廚八月到泰國向泰王大展廚藝，明年八月更會坐郵輪去美國，煮「皇帝鮑魚」畀美國總統品嘗。


傳真︰2623-9278
電郵︰[email protected]