新民黨立法會議員容海恩日前透過橫額，宣傳自己正爭取北區醫院搞「翻身工程」。身為議員，寫錯「翻新」做「翻身」，搞到要收回橫額兼認錯。有網民今日發現新民黨主席葉劉淑儀喺港島區嘅另一條橫額仲「驚嚇」，就係年屆68歲嘅葉劉喺街邊橫額，宣傳佢今個月底會搞個「滲漏」講座，海報上仲有滴粉紅色嘅血，相當重口味。唔通葉劉想分享佢有咩特別個人嘅滲漏經歷？細看之下，原來葉劉係搞「樓宇滲漏講座」。

有網民睇錯咗，以為有「葉劉淑儀滲漏講座」、有人亦誤以為葉劉淑儀有「尿滲」問題、有人話葉劉係咪想撈埋盧宛茵嗰份賣成人尿片廣告。不過，有人就認定，葉劉想以「葉劉滲漏」牽起話題，令人人都知佢搞樓宇滲漏講座，令傳媒寫八卦新聞時幫佢做免費宣傳。查實，呢類滲漏講座一年四季、每個月都有，葉劉絕對唔係第一人搞。公民黨、民主黨、新同盟、民建聯、民協等兼多位無政黨嘅區議員，經常都會喺區內邀請公正行搞滲漏講座，好多地區組織、業主立案法團、保險公司、專業學會都會舉辦，等市民知道如果大廈出現滲漏時要點做、責任喺邊個度？只要上網就好易搵到，唔使一定要幫襯新民黨嘅。