現年31歲嘅韓國男團JYJ成員朴有天，前年喺當兵期間因為捲入四宗性侵案，令到佢形象跌至谷底。

而去年退伍後朴有天一直未有工作安排，早前先宣佈本月10號及11號喺日本東京舉辦粉絲見面會兼小型演唱會「再會remenber the memories」，喺日本試下水溫。

前日佢已低調出發到日本為今次見面會做準備，當時佢戴上黑色口罩現身機場。而今日首場見面會終於正式開始，朴有天咁耐冇見粉絲，同埋喺台上表演，佢出場時有啲緊張，之後喺台上賣萌冧粉絲，當唱到《向日葵的約定》時，佢開頭唱幾句無耐就忍唔住喊起來，令台下粉絲大感心痛，猛叫佢唔好喊。

而根據有到現場嘅粉絲透露朴有天喺台上就話曾經擔心過冇得再喺台上演出會點，但見到有咁多粉絲到機場接機，令佢都放下心頭石，希望大家繼續支持佢。其間又反問粉絲自己可以繼續喺日本展開活動嗎？好似以前一樣繼續參與電台節目等，台下粉絲自然拍掌讚好。同時朴有天又預告5月將會展開小型巡演，更承諾會展示比0依家更瘦嘅自己比大家睇，又自言已作定好多歌為巡演做準備。

另外，朴有天又自爆曾肥到有76kg(約167磅)，但一個月內成功瘦咗6kg(約13磅)，並透露係靠做運動同埋一天食一餐減磅。

更多韓流，喺晒《娛果》
http://fb.com/appledailyent