有一個台是廿四小時播警察巡更實錄,另一個台則長駐醫院急症室,不知道是否都已早取得了那些被追到氣囉氣喘的疑犯及被一把刀插在心口的傷者的同意,否則怎可能把過程播出街,雖說疑犯及病人面上都已打了格仔,但係我唔認得啫,佢哋啲家人朋友實認得㗎嘛,點解可以咁做?
前幾年JerrySpringer主持的家庭鬧劇現場節目火得很,甚至有同名的舞台劇出現。有一個頻道廿四小時播出此類型節目,大婆控訴老公有二奶,二奶原來暗中養了小白臉,揭穿小白臉原來係老公個仔,以為亂倫之際,大婆又爆出原來個仔唔係老公親生,總之就盡情發掘人類最醜惡的陰暗面,台上台下冇個好人。雖然明知係假嘅,但電視觀眾見到人家有鬧劇便𠺝𠺝大笑,亦都唔係好人。希望此種節目風氣切勿吹到香港,香港已夠烏煙瘴氣,再加一把勁,肯定變成妖獸都市。