執筆之時剛度過黑色24小時,周三晚同大行老友入跑馬地睇國際騎師賽,兩個人信心十足捧蘇銘倫場,結果食白果兼輸到反艇,返到屋企條氣唔順上網買波,歐冠盃落注買曼聯贏,開場無耐見史高斯為曼聯射入1球,條氣順番好多尋美夢去,點知起身睇賽果,曼聯居然倒輸1:2畀賓菲加,趙飛雲當時即刻打咗個「突」,因為啲衰嘢通常係一不離二,二不離三。
昨日睡眼惺忪上到股票行,坐咗冇耐終於出現近期最擔心的事。日股早市升上15520受阻但走勢尚穩,但午市重開(香港時間11:30)後不久即上演笨豬跳,搞到港股亦出現雞飛狗走的場面。
日股最後以全日低位15183收市,大跌301點,港股午市重開後自然亦被淡友踏多兩腳,其後好友雖努力反撲,但恒指最終仍大跌255點,收14879。
恒指本周截至昨日為止下跌321點,看來今日是無力挽乾坤作第6周上升。更甚者,若恒指今日未能重返20周線14938之上收市,下周的波動區,將下移至14940-14400水平。