63歲區瑞強（Albert），入行超過40年，其「民歌王子」形象深入民心，每年他都會開個人演唱會，比起一些後輩歌手開騷更頻密。本月中，他將舉行兩場音樂會，今次有別以往，他首次以免費形式，招待六間團體包括義工、教師、護士、消防及警員等來欣賞演唱會。Albert形容這個「私房演唱會」，不單止向有關團體致敬，更寄望同行的公司、製作人及歌手，以音樂傳承，延續下去搞免費騷，望能做到雅俗共賞。

Albert早前在佐敦接受《蘋果》專訪，向來甚少開騷做宣傳的他笑言︰「今次做宣傳仲多過以前。」對於今次開免費騷，Albert表示今年5月才決定做，他說︰「我唔係好偉大，只係好佩服佢哋，我只係得把口，希望向佢哋致敬。」不單止零收費，Albert還自掏腰包製作一套兩隻「非賣品」CD，將送贈入場人士，他說︰「如果我送海報，肯定實掉咗去，但如果我送隻CD，觀眾係唔會掉咗去。」

Albert指今次免費騷作為試點，望延續下去，但點計多少也要成本，Albert表示他正在努力眾籌中，他說︰「我有2、3百張飛留番畀我嘅朋友，我已經喺朋友圈同佢哋講，捐1萬又得，捐1蚊都得，我都會請佢哋嚟睇，捐款會全部交由音樂農莊處理，如果到時真係唔夠，我自己包底，唔使死嘅，起碼我唱都唔收錢。」

談到傳承，Albert兩位兒子也遺傳了他的音樂天份，他說︰「自細佢哋一個學鋼琴，一個學結他，但我從來冇逼佢哋，等佢哋自由發揮。」本身有8兄弟姊妹的Albert，他排行第五，上有兄姐，下有弟妹，父親做建材生意，因有兄弟二人代打理父業，他可以自由選擇唱歌作為職業，因此他同樣放手，讓兩位兒子自由選擇路向。

但機緣巧合下，兩位兒子現在也從事音樂方面的工作，大仔區昕進做音樂數碼分析，細仔區昕望幫Albert手打理公司，「佢哋讀完大學，喺外面做咗幾年嘢，無心插柳細仔o依家拍住我一齊做，不論我間唱片公司、慈善定我私人嘢，我都拉佢落水做，細仔拍咗我1年，佢覺得好適合。而大仔就喺一間音樂大集團做音樂數碼分析，o依家唔係賣一隻隻CD，而係100萬隻歌咁賣，佢就做數據分析。」至於兩子到時會否上台唱歌助慶，Albert笑言︰「我哋有兩次，三兄弟同台一齊唱，係呀！人哋形容我哋係三兄弟。」既然唱得，又怎會只得他兩子，Albert笑言連他的兄弟姊妹，個個都識唱歌，到時一家人會否上台來個大合唱呢！

採訪︰羅婉玲
攝錄︰廖達燊

精選娛聞，喺晒《娛果》
http://fb.com/appledailyent