王君馨(Grace)同老公Daniel今日不幸遇上交通意外，佢喺ig圖文並茂轉述事件，透露原本打算趁父親節約爸爸去銅鑼灣食飯，點知喺東區走廊的士突然急停，雖然冇撞到前面架車，但後面私家車煞唔切制，搞到兩車相撞。

Grace仲拍埋條片，佢話同老公條頸都有少少chok親，要上埋救護車。佢話﹕「胸部頸部同背脊有少少Chok親，老公個頸同埋頭有少少chok親。之後落車比口供，影到撞到我哋嗰架車炒到咁，好彩冇人大受傷。

第一次坐真正嘅救護車，身為小演員的我當然有少少好奇，問長問短，仲問佢哋有冇睇動人的時光。15分鐘後到灣仔Ruttonjee Hospital.一個鐘頭內，睇咗醫生寫咗報告，落咗口供，攞咗消炎藥同藥膏離開。醫生話骨同埋神經線冇事，應該係拉傷肌肉，休息幾日應該冇事，感謝神！」王君馨仲感激警察哥哥、救護人員同埋醫生護士嘅照顧，令我哋每一刻都可以放心，佢話﹕「A bit shaken by everything that just happened, but feeling safe and happy to be alive.（有啲嚇親，不過依家覺得好安心同埋慶幸仍然活着。）」王君馨話同爸爸餐飯最後告吹，惟有下次先再食過。

精選娛聞，喺晒《娛果》 http://fb.com/appledailyent