煲呔同廣東省省長黃華華開完粵港聯席會議，一齊開記者會，新聞統籌專員Andy何話趕時間，記者會得半個鐘頭，不過當煲呔同黃華華答完第二條問題，Andy竟然話夠鐘，lastquestion，八方睇睇錶，咁快半個鐘？
呢場粵港領導人記者會，最終只得三家傳媒代表獲欽點提問，分別係《文匯報》、有線電視同廣東點心衞視。《文匯報》獲欽點好正常，有線係香港傳媒，入選都好合理，點心衞視都有份真係令人意外。大家唔識點心衞視好正常，呢個頻道今年開台，喺now先有得睇，可能Andy鍾意飲茶，所以畀DimSumTV問咗個有關粵港環保嘅問題，Andy叫完點心，下次不妨食番個「蘋果」吖，唔該。