無綫電視前業務總經理陳志雲被指串同助手叢培崑，串謀使代理人接受利益，上星期五喺金鐘高等法院被判罪成，當日除咗風雨不改陪伴左右嘅王喜，仲有當年被指係「迷雲黨」之一嘅鄧健泓都有現身。噚日有雜誌話鄧健泓因為要搞製作公司，需要靠山所以先「翻兜」對方。

「我公司係蚊型」

馮仁昭噚日打電話搵過鄧健泓，佢好無奈咁話：「呢5年嚟我哋不停有聯絡同見面，之前都有上載同陳生食飯嘅相，但唔係要每次都公告畀大家知。」
鄧健泓話佢去法院只係想支持好友，唔係想出風頭，講到佢之前冇出現，鄧健泓話：「我以往覺得呢件事係一件好簡單嘅事，我亦深信佢冇事，我出嚟就係怕好多記者，但18號嗰日對陳生係一個重要關口，如果罪成即係要判刑，我想去支持。」
鄧健泓又話，佢嗰日冇掛住做專訪，自己去亦唔係為訪問同影相，唔係去做宣傳：「對唔住，我係一個唔鍾意出風頭、唔鍾意俾好多人影相嘅人，我比較低調，所以我行都係行後排。」至於雜誌講到佢間製作公司同陳志雲好有關係，鄧健泓即刻話：「我要澄清一點，間製作公司係蚊型，係我同女朋友自己搞，佢（陳志雲）冇參與任何宣傳策略，我只係問過佢好唔好喺商台落廣告，唔知點解會寫成咁！」
撰文：馮仁昭