眾多湯品，我最愛豬肺湯，可惜人人都知洗豬肺好麻煩，每次想飲，惟有去長沙灣聚友。坊間很多地方有豬肺湯，卻不是間間像聚友般不怕麻煩，跟足古法。每有定單，老闆兼大廚耀哥，就會買定新鮮豬肺，大清早開始灌水清洗，其間會用剪刀在肺葉插洞，排走血水。經過半小時啤水，豬肺變得雪白晶瑩。「洗淨後，很多人以為汆吓水，或者蒸一蒸，就可以用嚟煲湯。其實脹卜卜的豬肺入面，仲充滿血水，煲起嚟，湯會腥會濁。」據老師傅教落，要將豬肺放入白鑊炒，才能將血水去盡。果然，耀哥一邊炒，豬肺就釋出大量白泡，不停炒了十幾分鐘，豬肺才停止出泡，而且外皮變得金黃。每盅湯十二両豬扇骨、一個豬肺、少許菜乾，還有薑片花雕同燉五小時。打開蓋，菜乾清香撲鼻，湯色透亮，入囗清潤鮮甜，豬肺腍滑得來充滿彈性，蘸點生抽才吃，叫人心滿意足。