沒有鄉音與食字，沒有無厘頭與嬉皮笑臉，難以想像眼前的就是林敏驄。

一說起林敏驄，通常都離不開無厘頭瘋瘋癲癲等印象，而這個形象甚至令人忘記他原是80年代最舉足輕重的詞人之一。近年已經淡出樂壇而轉戰去拍戲的他，失驚無神於今年6月9、10日在紅館開作品展演唱會，而今次亦一反常態地認真接受訪問，回顧自己入行35年的情與癡。

「我81年開始填詞，填到86年就退休，咁多首歌都係嗰五年填」，當年只有22歲的林敏驄因寫下第一首歌《這是愛》而加入詞壇，自此就創作多首經典金曲，如譚詠麟的《忘不了你》與《愛在深秋》、張國榮的《無心睡眠》，陳百強的《深愛著你》等等。不過填詞出名快手的他，這些永恆不朽的歌曲也是極速完成，就如《深愛著你》半小時內就寫好。於是他靠著填詞天份與努力，在當時還是黃霑、盧國沾與鄭國江三人天下中冒起，「當時有人笑我係唯一一個正職填詞人，因為其他人都有一份高職，我咪由佢哋笑。」

林敏驄笑言從來不寫日記，但重聽每一句歌都回想到自已何年何月何日在做甚麼，皆因他寫的都是真人真事。《愛在深秋》其實源自一張他拍拖時的舊照片，「個女仔唔知係倚住條電燈柱定棵樹，所以就有咗『讓我倚在深秋』呢句歌詞」。而寫《忘不了你》時候，他怎樣想不到最後一句詞，直至有日過海乘小輪，突然想到如果那刻掉倒水裡就會死去，因此就變成了「只要我一息尚存」。不過林敏驄坦言年輕時感情的遭遇，會比現在深刻得多，「嗰時嘅情歌，依家都寫唔番啦」，或者就如那個逝去的80年代，永不復返。

事隔八年再舉行個人作品展，很多圈中朋友聽到都二話不說答應演出，如譚詠麟、鄭伊健、鄭中基、草蜢等等，亦正在邀請林子祥和郭富城。這個演唱會除了見證林敏驄入行35年，原來他心中有一個使命，「呢個演唱會想帶觀眾返到最繁華最百花齊放嘅80年代，後生嘅朋友未經歷過，所以我想將呢個咁正嘅時代呈現佢哋眼前」。

擁有那麼多首經典作品，演繹的又粒粒巨星，難怪林敏驄都說「無憾啦，我寫完《忘不了你》都覺得無憾啦」。至於人生的遺憾，他則答得有點玄妙，「要後悔嘅嚟唔切，耿耿於懷的事，你可以睇係『整定』，發生咗就發生咗，下世做得好啲啦，哈哈」

這個既認真又安靜的林敏驄，你見過未？我見過，我真係見過！

記者：余傲芝、小米
攝錄：馮峰、Neo
攝影：仇志德
場地提供：鮮入圍煮