生日快樂呀!噚日係恒基地產(012)主席李兆基(四叔)87歲牛一,按照慣例,佢晚上喺半山麥當勞道惠苑大宅筵開十幾席,請親戚同埋恒地高層食飯。聞說,呢餐飯,每年菜式都好名貴,一定有最靚嘅魚翅同官燕,最尾就有熱辣辣蛋黃蓮蓉壽桃。
四叔生日其實好易記,就係每年農曆正月廿九日,佢多年來都會請家人、同事到屋企食晚飯。初時約有8圍,即大概80人;近年隨着恒地高層同事增加,佢嘅孫仔孫女數目越來越多,淨係講兩位公子,加埋都有7名孫仔孫女,所以圍數都越開越多,今年就約有16圍,過百人參加;咁多圍數,仲要分開喺佢大宅兩層樓擺㖭呀。
而賓客們通常7點左右到,開席前,四叔嘅家人、孫仔孫女就會圍住佢唱生日歌,然後切蛋糕;8點左右開席。