花旗最大按揭公司Countrywide唔掂，用晒40家銀行畀佢嘅115億美元備用信貸，評級俾人降到啱啱喺垃圾債券樓上，班銀行都幾好人，咁都肯放水，不過，實際未必係好唔好人嘅問題，而係救人救己啫，如果呢間嘢唔掂，借緊錢畀佢嗰40間銀行會點？
聯儲局同其他中央銀行繼續射水入銀行體系，仲將啲數期拖長到14日，問題有幾嚴重都應該諗到嘞，不過，係咪咁就搞得掂呢，邊有咁易。

花旗股市前晚跌過343點，收市前反彈，只係跌15點，彈得咁勁係咪見底？冇咁快，純粹係技術反彈，道指跌到落12517，同12500支持位好近，就借啲傳聞炒番上去。花旗嗰邊習慣用10巴仙嘅跌幅作技術調整同轉勢嘅分界，𠵱家同高位比較已經跌多過10巴仙，即係話唔係技術調整咁簡單，又多個藉口插落去。
港股昨日直情係坐超級過山車，最多跌過1200幾點，低位反彈力度好勁，追番1000點，埋單只跌285點，不過後市都係要睇歐美股市點走，無論點，呢個跌浪到𠵱家都已經輸死人，有錢同膽量「撈底」嘅人都唔多，最多都係走吓超超短線。
招行C輪9730：招行（3968）昨收25.45元，同其他銀行股一樣，中段沽壓好大，但係反彈嘅力度都唔曳，喺呢幾日下跌過程裏面，成交逐步增加，昨日成交仲大，靠近支持位出現大成交，反彈力度可以大啲，可以買啲招行C輪9730，昨收51仙，有效槓桿率4.4倍，博正股升上27.50元，到時9730應該喺70仙樓上，正股跌穿24.50元止蝕。