由新垣結衣主演TBS電視台劇集《逃跑雖可恥但有用》大受歡迎，電視台日前公佈季度業績，《逃恥》帶來咗20億日圓（約1.37億港元）收益，令到電視台連續兩年獲得盈利。

早前有傳曾播放《逃恥》同《四重奏》嘅逢星期二晚檔期，嚟緊7月會播放漫畫《KANNA s-an!》改編劇，由重量級女星渡邊直美擔正演出，今日電視台正式公佈消息，製作單位認為渡邊直美是最合適人選，渡邊直美受訪時仲擺咗個同漫畫主角一樣嘅甫士。

劇集故事講身材肥伴嘅渡邊直美，擔任設計師為照顧囝囝奮鬥，同時面對老公偷食嘅問題。今次係渡邊直美首度擔正拍劇，佢話最初聽到有機會拍呢部劇都感到難以置信，自言對於能唔能夠超越結衣BB成績感到不安，但會努力。渡邊直美有設計個人品牌，對於今次演設計師，佢就笑言希望角色打扮可以性感啲。